كنت بتكلم مع اصحابى الصبح وبقلهم ان الدكاترة والظباط والشيوخ همّا اللي معقدني في حياتي , راحوا قيلنلي طب و الدكاترة ليه ؟ كإن عادى ان الواحد يتعقد من الظباط والشيوخ , مشكلتي مع التلاتة انهم بينسوا نفسهم وبينسوا شغلهم و بيتدخلوا في حياتنا من غير احم ولا دستور وبيحاواوا يفرضوا علينا حاجات :
يعني لمّا أروح للدكتور علشان رجلي اتجزعت يكتبلي علي مرهم ويقوللي متلعبش كورة مع اصحابك , يا عم انت مش كتبت المرهم شكراً ممكن تقللي متبذلش مجهود انما متقليش ملعبش كورة طب ينفع العب تنس .
والظباط طبعاً حدث ولا حرج بس اللي كان بيستفذني ان يطلع ظابط يقلك بطاقتك تقوم بكل ادب واحترام تدهالة يقوم سألك وقايلك رايح فين ؟ , هيا دي مشكلتي السؤال ده يعني اية رايح فين , مش من حق حد يعرف اي انسان رايح فين دي حاجة شخصية _ طبعاً مراتك من حقها تعرف _ انما اي حد تاني مش من حقة .
الشيوخ طبعاً لمّا بيعدوا مرحلة النصح الي مرحلة الامر بيبقى الموضوع صعب , بس انا مشكلتي معاهم حاجة تانية , يعني لمّا تبقى بتدعي ورا الشيخ في الصلاة وعمالي تقول امين بكل خشوع ومش مدي خوانة و يقوم الشيخ قايل اللهم وفق ولاة امورنا وتلاقى نفسك تلقائي قلت امين .. استغفر الله العظيم لا يا رب مش امين خدهم يارب الله يسامح يا شيخ .. مش امين يارب مش امين .
