الثلاثاء، 5 يوليو 2011

لسه النظام مسقطش . !!

(1)
أول كلامي .. أهني الشعب أبو الثوار
اللي خلق ثورته .. تحت الرصاص و النار
اللي فرض كلمته .. ع الحاكم الجبار
ساقهم طابور للعداله .. للنداله عقاب
فضح جميع اللصوص .. ورا شيخهم الكداب
طلع حاميها حراميها .. طلع تصّاب
الملعونين -لا شماته - ف كل لوح وكتاب
و ع العداله البطيئه .. لينا ألف عتاب
فساد بيلضَم رئيس بوزير علي نواب
اترصوا كما سور .. حجب عن مصر أي نهار !!
........
(18)
تار الشهيد اللي ضحى .. في رقابيكم
دمه ما زال فوق رصيف غسلينه بإيديكم
اللي اترمي في بوابات الموت .. يحميكم
إوعوا في هوجه الكلام .. دم الشهيد تنسوه
ويسرقوه منكم .. ياما التاريخ سرقوه
ماهيش حكايه صوره ولا غنا تغنوه
ولا في هيصه الفرح ممكن عقولكو تتوه
أمَّه اللي بتنوح عليه .. وتقول : (ضنايا هاتوه
لو هيه شايفاكوا قرّبتوا من احلامه
ماكانتش تحزن .. حتلقاه حيّ في عينيكم !!
........
(22)
الثوره مش حكر .. لا ملكك و لا ملكي
ملك اللي يومها سند صدره علي السونكي
و اللي الرصاصه شالت عينه ولم يبكي
ملك الشهيد اللي فدا غيره بنيران و رصاص
رسم خريطه الوطن .. بالدم وبإخلاص
والّا انتو صدقتوا ما ماتوا وراحوا خلاص ؟
ورجعتوا تاخدوا الجمل بما حمل يا ناس
تتقلبوا ع الثوره حالا تقلبوا الإحساس
يكفي تآمر .. و لعب زمان من تاني
مانا كنت علي نيتي .. صحيتوا ليه شكى ؟!!
........
(29)
افتح لهم باب سجونك .. يسقط السجان
واطلق شباب خدتهم في الضهر م الميدان
وافلح في سجن اللي خان .. عندك فلان وفلان
من يقلع الزرع من حوضه .. يموت في الإيد
قول للي سرقوا الأمل و سرقوا لبس العيد
تاني السجون والحديد ؟ فادكم بإيه الحديد؟
هل وقّف الثوره و الّا عطّل المواعيد ؟
نكسر القيد و نصحى نلاقي نفس القيد
عاوزين سياسه جريئه وواضحه زي الشمس
معانا في الثوره و الّا نغيّر العنوان ؟
........
(37)
هل كنت عايز انقلاب و احنا عملنولك ؟
رجعنا شرعيتك .. و هتفنا لوصولك ؟
ما فضلش غير الميدان .. عاوز نسيبهولك ؟
أظننا عرفنا سكه مصر .. و طريقها
من بعد طول العطش بلّ الامل ريقها
كان الشهيد رمزها .. بريئها و بريقها
لو بحركم طامي عامي .. ما يغرّقها
فازاي تفرقها يا عشمان بتفريقها ؟
إوعى تقلّب في أشعاري بعيون الشك
لأه .. اعتبر دا جواب و أنا كتبتولك !!.
........
أجزاء من قصيده : لسه النظام مسقطش
عبد الرحمن الابنودي - 15 يونيو 2011